Tata Ibadah Malam Natal di GKPS Jambi, Selasa 24 Desember 2024

 

TATA IBADAH MALAM NATAL GKPS  JAMBI -Resort Jambi -DISTRIK VI

Malam Natal, 24 Desember 2024 

Tema:              Hasadaon pakon Pangidagion na Marbuah (Kolosse 1: 10)

Sub Tema:       Pataridahkon Hita ma Hasirsironta Pasaudkon Hadoharon pakon Hadameion i Tongah-tongah ni Masyarakat ampa Negera Maronjolan bani Hapintoron ampa Hasintongan (Yeremia 29: 7, 33: 6; Rom 13: 3; Titus 3: 1)

 

I.          PERSIAPAN

(Prosesi, sanggah Mandodingkon Hal. 37: 1 + 3, ganup kuria jongjong, siparugas na pagara lilin hun konsistori langsung hulobei pagarahon lilin)

1.       Mandoding Hal: 37:1+3 “Hatuahon do Hamegahon do”

1.       Hatuahon do Hamegahon do partubuhon ni Jesus in

Roh Sipaluah bani na magou, megah-megah ma uhurta in

Roh Sipaluah bani na magou, megah-megah ma uhurta in

3.       Hatuahon do Hamegahon do partubuhon ni Jesus in

Megah uhurta bani Tuhanta, megah-megah ma uhurta in

Megah uhurta bani Tuhanta, megah-megah ma uhurta in

 

2.       Pagara Lilin Natal

1.    Parambilan              5. Mewakili Inang

2.    PMJ                         6. Mewakili Namaposo

3.    Mewakili Majelis     7. Mewakili Lansia

4.    Mewakili Bapa        8. Mewakili S. Minggu           

 

II.        KEBAKTIAN

1.         VOTUM-INTROITUS-TONGGO

P:    Ibagas goranni Naibata Bapa, Anak-Ni Tuhan Jesus Kristus pakon Tonduy Na Pansing, Sitompa langit pakon tanoh on. Amen. Puji ma Jahowa, dilo ma goran-Ni, pabotohkon nasiam ma ganup horja halongangan-Ni in. Marmalasni uhurma sagala sipindahi Jahowa.

J:     Hupindahi do Jahowa pakon hagogohon-Ni, hupindahi do tong-tong bohi-Ni.

P:    Paingat-ingat nasiam ma sagala halongangan na binahen-Ni, tanda halongangan-Ni pakon uhum na niluarhon-Ni pamangan-Ni.

J:     Ia do Jahowa, Ia do Naibatanta, sab do bani dunia on uhum-Ni

P:    Idingat do tongtong padan na binahen-Ni, hata na niluarhon-Ni hubani maribu-ribu sundut

J:     Puho ma arbab pakon husapi, sihol puhoanku do siang ari, sihol pujion do Ham, ale Jahowa i tongah-tongahni bangsa-bangsa, sihol dodingkononku do Ham i tongah-tongahni marga-marga.

P:    Ai gijangan do marimbang langit idop ni uhur-Ni, anjaha hasintongan-Mu das do ronsi hombun.

J:     Patimbul Ham ma diri-Mu mangatasi langit, Ham Naibata, anjaha hu sab tanoh on Hamuliaon-Mu, ase maluah halak na hinaholongan-Mu. Paluah Ham ma marhitei tangan siamun-Mu anjaha balosi Ham ma ahu. Haleluya

P+K:  (Mandodingkon) Haleluya, Haleluya, Haleluya.

P:    Martonggo ma hita! Ham Tuhan Naibata, iahapkon hanami do banggal ni holong-Mu hubennami. In ma marhitei na iberehon Ham Anak-Mu na sasada in ase ulang magou hanami bani goluh nami. Marmalas ni uhur do hanami halani holong pakon idop ni uhur-Mu. Patalup Ham ma hanami mamuji pakon mangkatahon tarima kasih hu Bamu, marhitei perayaan natal nami saborngin on. Bere Ham bannami gogoh laho mangkagoluhkon haluahon na dob binere-Mu in bannami. Ase totap ondos malas ni uhur bannami ibagas na mandalani ari-ari ni goluh nami. Jalo Ham ma sombah pakon pamujion nami marhitei Jesus Kristus Sipaluah hanami. Amen.

 

2. Mandoding Haleluya No. 44 : 1 + 3 “Pamalas Uhurta”

1.      Pamalas uhurta do partubuh-Ni

Jesus Sipaluah haholongan in

Jesus Sipaluah haholongan in

3.      Maparah tumang do hamagouan in

Anggo lang roh Jesus Sipaluah in

Anggo lang roh Jesus Sipaluah in

 

3.  Liturgi I : PANOMPAON

Prolog: Naibata do na manompa sagala na adong, gok Bani do haganup na tinompa-Ni in. bani mungkahni dear do haganup itompa. Taratur domu hubani aturan ni Naibata, seng dong na paseksuk ampa na manlembang. Ia do homa na manompa jolma gabe haondosan ni haganup jadi-jadian-Ni anjaha marsangap Naibata marhiteihonsi.

 

Sintua:          Langit mambaritahon hamuliaon ni Tuhan. Awang-awang patugahkon habanggalonni na tinompa in. borngin margantih pakon arian, lang adong na ponop i lobei ni Tuhan. Poltak ma mata ni ari, jumpah ma sada ari na bayu janah ipungkah ma goluh na baru. Ganup ari patugahkon hapentaran ni Naibata. Jumpah ma borngin, mata ni ari margantih bulan. Lopus ma sadari margantih hubani minggu, bulan das hubani na satahun. Sonai ma layur, patuduhkon hatotapon ni hapentaran Naibata!

Syamas:         Ambahni ai ijadihon Naibata do homa poyon-poyon, suan-suanan, harangan pakon dolog na maratah sonai age hayu na marbuahkon na madear gabe sipanganon ni jolma in pakon pinahan sonai age poyon-poyon na marbunga na jenges tumang mambahen dear tonggoron anjaha sonang paruhuran.

Bapa:            Ijadihon Naibata do homa manuk-manuk na marhabangan na patangarhon sora na lurlur laho pasangapkon Naibata, sonai pakon dengke na i laut ampa haganup binatang na manggulmit na i atas tanoh on. Marsiboan masamni anjaha dear do hagaup

Namaposo:     Bani mulani dob ididah Naibata jenges haganup na itompa in, gabe itompa ma use jolma usih songon rupa-Ni. Dalahi pakon Naboru do sidea itompa. Iondoskon homa do bani sidea tanggung jawab laho manrajai ampa manramotkon ganup na tinompa-Ni in. Bani mungkahni, haposan do jolma in laho manramotkon tinompa-Ni. Inahkon do sidea bani pohon Eden. Sonang do sidea anjaha aha pe lang na hurang

Inang:             Anggo na pardiatei haganup na tinompa in, na boi ididah, nijolom ampa na boi iahapkon, lang tarpikiri sonaha parjadini. Tatap ma dolog in, kawahkon ma langit, bogei ma sora ni bah mardalan anjaha ahapkon ma parhombus ni logou. Pardiatei ma sagala na manggulmit, pinahan, manuk-manuk ronsi na legan. Apalagi tinompa na so boi niidahni panonggor. Tonggor ma maragam do keunikanni, sonaha do parjadi ni in? Anggo sonai aha do perenunganta hunjin?

SM.:          Halongangan do horja ni Naibata. Haporsayaon do hansa na boi mangarusi ai. Halonganngan do parjadi ni natinompa in. anjaha halongangan do in banta, halani iondoskon Naibata do, haganup na tinompa-Ni ai hubani jolma.

Lansia:           Puji ma Naibata na manompa langit, tanoh, laut pakon haganup pangisi ni marhitei kuasa ampa hapentaran-Ni. Puji ma Naibata na tongtong marmuduhon na tinompa-Ni in, marhitei na mangondoskon pasu-pasu-Ni. Totap ma hita gabe saksi pasal pambahenan ni Naibata bani gouhta.

PMJ:           Marhitei haganupan na tinompa in, sai lambin itandai hanami ma Ham Tuhan. Sihol niuhurnami, ase lambin bagas ma pangarusion nami pasal Ham. Sorapkon Ham ma Tonduy Na Pansing in hubannami ase lambin dohor hanami hu-Bamu. Patuduh Ham dalan-Mu ase ulang kahou hanami, buha Ham uhur sonai age pingkiran ase tubuh haporsayaon nami hu Bamu. Pinuji ma Ham Tuhan humbani gok ni uhur nami. Amen.

 

4. Mandoding Haleluya No. 242 : 2 - 4 “Talun Jenges Do”

2.      Talun jenges do, juma pe jenges do, Na maratah-ratah in.

Jesus tarlobih, bai hajengeson, Sibaen malas ni uhur in

3.      Bulan lihar do, bintang pe torang do ‘ge mataniari in

Jesus tarlobih, bai haliharon, Lobih humbai ganupan in.       

4.      Doskon halinoh, na jenges itanoh, Marimabangkon Jesus in

Seng sihaposan, ganup na jenges, Lobih ni Tuhan Jesus in.

 

5.    Galangan Koor/ Vocal Group/ Puisi

 

6.    Mandoding Haleluya No. 384 : 1 “Anggo Sai Tong Hupingkiri”

1.      Anggo sai tong hupingkiri, pambahenankin

Simbei do tong ganup tingki, seng margagan in

HolongMu Tuhan pangajamankin

Sai marpangulaki, Ham mangidah in

HolongMu Tuhan pangarapankin

Seng dong parsuhutan, pitah Ham do in

 

7.    Litrurgi II: DOUSA PAKON PANGKORHONNI

Prolog:    Ibere Naibata do jolma in ianan sijengesan pakon goluh namarhasungkupan bani haganup na ihaporluhonni. Naibata do na pajongjongkon aturan bani ianan ai. In ma na maningon dalankonon ni jolma na mangiankon ianan ai. Jenges do hagoluhan pakon parsaoran ni jolma in sadokah ra sidea mandalankon aturan ni Naibata. Tapi dobni madabuh do jolma in hubagas dousa halani na iberlakuhon anjaha ihorjahon sidea aturan na itawarhon ni sibolis bani ianan na pinasirsir ni Naibata.

Majelis:     Ibotoh Naibata do das ija kemampuan ni jolma in halani Ia sandiri do na manompasi. Ai do ase ihatahon Naibata anggo humbani hayu pambotohan ni na madear ampa na masambor in, seng bulih panganon ni jolma in, halani hamateian mando na gabe rupei ni  halak namangankon ai. Tapi lang tarhorom jolma in hisap-hisap ni dagingni pakon sihol ni uhurni. Ibuat ma na lang boi buaton, ipangan ma na lang boi panganon. Sonai ma jolma in mangkorjahon horja na mambahen roh hamateian bani goluhni, ronsi mardousa.

Bapa:        Dousa mambahen lang dear be hubunganta pakon Tuhan in. ise do mambahen in? tontu hita jolma. Selaku sahalak bapa, ibotoh hanami do aha na gabe harosuh pakon hagigi ni Naibata, sonai homa  na madear pakon na masambor, Tapi gati do hanami mangkorjahon na so iharosuhkon Naibata anjaha lang mampu hanami patalarhon pitah na madear ibagas goluh nami. Hajongjongan nami selaku malim gati lang marhataridahan  itongah-tongah ni goluh parumahtanggaon.

Inang:      Hanami pe selaku inang, tangkas do namin ibotoh hanami aha na gabe tugas pakon tanggung jawab nami. Tapi gati do hanami lang gabe pasu-pasu halani na lang tarpuji parsahap pakon  pambahenan nami.  Hurang do hanami mamparayak hadoharon ampa hadearon itongah-tongah ni keluarga, gareja sonai masyarakat. Ase Reels bani FB siparayakon nami, mar-PA lupa ma.

Namaposo:     Sadokah na ihutkon titahni Tuhan in ma na mangkatahon: “Rajai hanima ma dengke na i laut, manuk-manuk na iawang-awang pakon sagala binatang ba manjulur iatas tanoh on”. Au ma selaku Namaposo, lang be bertanggungjawab bani tinompa-Mu. Sugari bani lingkungan, bani diri sandiri pe sipata lang huargahon angkula ku. Marsigaret, mamangkei Narkoba, Miras bahkan mambalap liar gati huhorjahon.

Remaja:    Hanami remaja pe gati do berontak bani bimbingan pakon pengawasan humbani orang tua. Sihol do uhur nami hidup bebas sadalan pakon rosuh ni uhur nami. Lang isadari hanami paboa na porlu tumang ope hanami idampingi halani proses perkembangan na sedang ialami hanami. Nomor sada na ibagas uhur nami mar-Mobile Legends, Martiktok, Instagram, pakon na leganni, anggo marlajar lang pala.   

SM. 1:      Buei do podah pakon pangajarion na ijalo hanami humbani orang tua pakon guru. Tapi gati do hanami lang bujur mangkorjahon na sinuruh ni orang tua pakon guru. Sihol uhur nami mamakei panorang, laho marguro-guro dob ni tangis halani martinggil bani hasoman, ibere manamin sen (uang) bahat ase marjajan anggo mangan i rumah lang pala. Dobni lang jumpahan hanami bani hapentaran halani hurang do pamabalosion nami.  

SM. 2:        Au pe selaku anak sekolah minggu gatinan do lang parduli bani tinompa ni Naibata, buang sampah sembarangan. Padahal gati do hutangar hatani Tuhan manrajai ampakon manramotkon do hita sedo na laho pasedahon.

 Lansia:      Hanami selaku orang tua i tongah-tongah ni Gereja pe gati do lang parduli bani aha na masa bani gereja, namin adong do masukan pakon pemikiran na boi mangurupi horja pangidangion ibagas gereja. Gatinan do hanami lang mambere podah janah lang semangat bani na manghobashon horja na madear itongah-tongah ni gereja.

 PMJ:         Bani perkembangan sondahan on, zaman seng ongga salah, tapi halani in do namengubah rotasi zaman. Akhir ni jolma na lang boi manrajai dirini ase bahatan ma jolma lang sabar paimahon giliran, antigan ia manjalo janah antigan ia mambere. Lang heran hita mangidah buei na domma maseda i dunia on. Rosuhan jolma in manrajai marimbang irajai, rosuhan jolma in memerintah marimbang iperintah. On ma pangkorhonni dousa. Holong ma uhur-Mu Tuhan bannami pardousa on.

 

8.    Mandoding Kidung Rohani Simalungun: “Ge pe Gerger”

Halani ai oh hasoman, haganupan hita da...hita da.

Ulang lupa hita da, bai hatani Tuhan in.

Porini au oh Tuhanku, namanlanggar titahMu, titah-Mu.       2x 

Ulang moru holongMu, bangku na pardousa on.                     

       Ge pe gerger dousanta songon, par gergerni hiou nasumba.

       Gabe putih boi ibahen Ham, songon parputih ni kapas.

       Hubanta pardousa on...4x

 

9.    Liturgi III: BAGAH-BAGAH NI NAIBATA PASAL HALUAHON

Majelis:       Marulak-ulakan do uhurni Naibata dompak jolma in halani seng marosuh uhurNi mangidah hamateian ni parjahat, tapi ase mulak do parjahat ai manadingkon dalanni. Halani ai sihol do uhurni Naibata laho paluahkon jolma humbani parjabolonan ni dousa. Ibagah-bagahkon ma haluahon bani jolma in marhitei na sihol roh Naibata hu dunia on ibagas Jesus Kristus. Ase ulang adong na magou age sada jolma in hinorhon ni dousa.

SM. 1:             Yohanes  3:16 (Mambasa Bibel)

SM. 2:             2 Petrus 3:10 (Mambasa Bibel)         

Remaja:          Sak. 9 : 9-10 (Mambasa Bibel)

Namaposo:     Mika 5:1-3      (Mambasa Bibel)

Inang:             Jeremia  31:33. (Mambasa Bibel)

Bapa:         Jadi Ahu, ahu sandiri ma na manlangkah laho manobus bangsangKu humbani parjabolonan, nini Jahowa parholong ni atei banggal in. Tongon, ise pe lang na boi manobus dirini, barang targalarisi partobusni bani Naibata.  Ai humbani nagori toruh do Jahowa  mandokdok jolma in. Hasangapon ma bani Naibata ibabou, damei ma itanoh on bani jolma na hinarosuhkon-Ni.

 

10.  Mandoding Hal. No. 315:1-2 “Sangap-sangap bani Jesus Tuhankin”

1.      Sangap-sangap bani Jesus Tuhankin

Na roh do Ham hun Surga hun rumahMu

Sangap-sangap bani parrohMu hu tanoh on

Gabe doskon jolma Tuhan parholong in Sangap, sangap

2.      Haganup parmahan jalo ma tongon

       Barita malas uhur hun surga in

       Ai saborngin on do tubuh Tuhan Jesus in

       Ai tibal do ia bani palangka in, sangap-sangap

 

11.  Liturgi IV: PARTUBUH NI SIPALUAH IN

Pengantar Jemaat:  Bingkat do Jahowa laho mangidopi jolma in marhitei na ilayak-layakon-Ni Anak-Ni na sasada in bahen haluahon ni dunia on. jalo hita ma na sihol roh paluahkon hita anjaha martuah ma ganup halak na martenger ni uhur Bani.

Wakil Peng. Jemaat:   Ulang mabiar hanima! Tonggor ma, ai ambilan malas ni uhur banggal do huboan bannima, parulihan ni ganup bangsa. Ai domma tubuh bannima saborngin on, i huta ni si Daud, Sipaluah in, in ma Kristus Tuhan in!  tampei bani abarani do panggomgomion, anjaha ibahen do goranNi: Paruhur Halongangan, Naibata Parkuasa, Bapa sadokah ni dokahni Raja Damei. Parrarat ni harajaon-Ni ampa hadameion-Ni seng marpunsa ai bani hotak ni si Daud ampa bani harajaonni. Halani ipatotap anjaha ipatoguh do ai marhitei uhum pakon hapintoron humbani sonari nari ronsi sadokah ni dokani.

Sekretaris Jemaat:   Titah na baru do na husurathon bani nasiam, anjaha sintong do in ibagas Kristus ampa ibagas nasiam, ai na salpu ma na golap in, anjaha domma marsinalsal Panondang na sintong in. halani ai tanggali hita ma pambahenan hagolapan, anjaha pakei hita ma sinjata haliharon.

Bendahara Jemaat:  Natal sihol patugahkon pasal sibere bere ni Naibata na tang sibanggalan hubani jolma. Anjaha sekaligus do homa in laho patugahkon malas ni uhur ni Naibata anggo haganupan jolma sir-sir manjalo sibere-bere-Ni. Iajari do hita laho mangkagoluhkon paboa kepuasan pakon malas ni uhur bani goluh on  sedo pitah halani  na adong na ijalo hita, tapi mampu do halak na porsaya laho marmalas ni uhur halani boi ia marsibere-bere bani goluhni. Dear do renungkononta sonaha ma nani sikapta khususni pasal na marsibere-bere.  

   

Ketua Bapa:        Partubuh ni Tuhan Jesus na gabe tanda paboa seng ipadokah-dokah Naibata bagah-bagah-Ni laho paluahkon jolma in. Lumbang do uhur-Ni mangidah hita, ai ipangindo uhur-Ni ulang ma magou namin atap ise pe, tapi das ma ganup tene hu hamubahon ni uhur.

Ketua Inang:         Ihatahon Tuhan Jesus do “Ahu do Dalan, Hasintongan pakon Hagoluhan, seng adong na boi das bani Bapa in anggo lang marhiteihon Ahu.  Na laho do Ahu pasirsirhon ianan hubani halak naporsaya bangku irumahni BapangKu”

Ketua Namaposo:    Ihatahon Tuhan Jesus do “Ahu do Parmahan namadear, ibere Parmahan namadear do hosahni mangkopkop biri-biri-Ni.  Ibobai Parmahan namadear do biri-birini hubani sampalan na mombur.  Ase totap ma hita sirsir iparmahani Tuhanta

Ketua SM.:              Gabe daging ma Hata in, anjaha marianan itongah-tongahta. Domma ididah hanami hasangaponni Anak sasada na humbani Bapa in. Gok do idop ni uhur-Ni ampa hasintongan-Ni.

 

12.  Mandoding Haleluya No. 39: 1 +  3 “Sonang ni borngin in” (ipamatei lampu janah jongjong kuria, pagara lilin na dob ibagihon)

1.      Sonang ni, bornginni in, sanggah roh Jesus in

Sonang modom do halak ganup, dua mando na puho in rup

Mangoromi Anak-Ni Jesus Tuhanta in

3.      Buei ni tuah ijin, sanggah roh Jesus in

Tor maluah pardousa use, humbai hamagouanni hape

Ben na roh Sipagoluh, Jesus, Tuhanta in.

 

13.  Ambilan

 

14.  Mandoding Haleluya No. 41: 1, 3 “Domma Jumpah Use Ari Pesta in”

(Patumpu galangan)

1.      Domma jumpah use ari pesta in, partubuhon ni Tuhanta Jesus in.

Turun hape Ia roh hun surga in roh manohu hujon.

Hasangapon bai Naibata, damei damei bani jolma.

Megah uhurni Naibata hajolmaon use

3.      Sombahnami hu Bamu na dob roh on, Ham siboban damei hu dunia on.

Sai pasorap Ham bai uhurnami on, damei-Mu o Jesus.

Hasangapon bai Naibata, damei damei bani jolma.

Megah uhur ni Naibata hajolmaon use.

 

15. Tonggo Panutup- galangan-tonggo riap-pasu-pasu

P:    Ham Tuhan Naibata, domma ipasaud anjaha ipatalar Ham holong-Mu hubannami marhitei  Anak-Mu Tuhan Jesus Kristus na roh hu dunia on.

K:   Ajari ham ma hanami mangkagoluhkon haluhaon nami, marhitei na sirsir hanami mardamei pakon marsihaholongan ibagas goluh nami.

P:    Ham do sitompa pakon simada haganup anjaha maningon aturan-Mu do na saud bani dunia on.

K:   Ajari Ham hanami ase ulang igantih hanami harosuh-Mu gabe harosuhnami na saud ibagas goluh nami.

P :   Ambilan malas ni uhur do na ondos bannami bani panorang on anjaha parulihan ni haganup bangsa.

K:   Mandodingkon Hal. No 148:1

       Layak do Ham mambere au, o Jesus Tuhankin

       Ihutkon Ham daoh pe au, mambuat uhurhin

P:    Bani panorang idop ni uhur do ho hutangihon, anjaha bani panorang haluahon do ho huurupi. Tonggor ma, sonari ma panorang idop ni uhur, tonggor ma, sonari ma panorang haluahon.

K:   Mandoding Hal. No. 459:1

       O Tuhan tiap jam, au mamorluhon Ham

       Ai Ham tumang na boi pasonang uhurhin

            Bai haganup ianan, Ham do hupindahi

            Na roh do au sonari holong ma Ham 

P:    Martonggo ma hita mangondoskon galanganta hubani Tuhan Naibata…(Agenda GKPS).... Amen.

       Riap ma hita martonggo marhitei tonggo na niajarhon ni Tuhan Jesus hubanta:

P+K:    Ham Bapa nami na  i nagori atas…........psn.

P:    Laho ma nasiam, baritahon janah saksihon nasiam ma Ambilan Na Madear in, ija pe nasiam marianan.

       Jalo (nasiam/ hita) ma pasu-pasu humbani Tuhan Naibatanta:

“Idop ni uhur ni Tuhanta Jesus Kristus, pakon holong atei ni Naibata  Bapa ampa parsaoran ni Tonduy Na Pansing ma mangkasomani (nasiam/ hita) haganupan humbani sonari-nari, ronsi sadokah ni dokahni. Amen”

P+K: (Mandodingkon) Amen....Amen....Amen.

      

(Selesai Ibadah Natal, Jemaat Bernyanyi “Selamat Hari Natal” Sembari Bersalam-salaman)

 

       Selamat Hari Natal                 Salam bagimu sekalian

       Selamat Hari Natal     2x       Selamat hari natal

       Selamat Hari Natal                 Dan Tahun Baru

       Dan Tahun Baru

 

 

III. Acara Varia Natal

1.      Kata Sambutan

2.      Snack Natal

   

Haganupan Pendeta, Penginjil, Vikar Pendeta, & Magang GKPS Distrik VI

padashon:

Selamat Natal 24-25 Desember 2024

Selamat Tahun Baru 01 Januari 2025