Menyongsong Pesta Minggu Inang GKPS Ke 66 Tahun, Minggu 3 Maret 2024

Menyongsong Pesta Minggu Inang GKPS Ke 66 Tahun, Minggu 3 Maret 2024.

TATA IBADAH

MINGGU SEKSI INANG GKPS

&

HARI PEREMPUAN INTERNASIONAL

GKPS Jambi-Resort Jambi

Minggu Okuli

3 Maret 2024

 

 

TEMA:

“Hasadaon pakon Pangidangion na Marbuah”

(Kolosse 1:10)

 

SUB TEMA:

“Pataridahkon Hita ma Hasirsironta Pasaudkon Hadoharon pakon Hadameion i Tongah-tongah ni Masyarakat ampa Negara Maronjolan bani Hapintoron ampa Hasintongan.”

(Jeremia 29:7, 33:6, Rom 13:3; Titus 3:1)”

PARSIAPAN

·         Marlajar Doding

·         Tonggo i Parhobasan

 

PRAELUDIUM (Jongjong Kuria)

Singers mandodingkon Hal. No. 303:1-3 (Barisan Prosesi)

1. Na pansing na pansing Tuhan parkuasa,
ari on hanami mamuji Naibata.
Napansing napansing janah marjumbalang
Sitolu sada na sangap tumang.

2. Na pansing, na pansing hotak-Mu i surga,
halak na mapansing manrogop hu Bamu.
Haganup malekat sai mamuji Tuhan,
Raja na sangap sadokah ni in.

3. Na pansing, na pansing na seng boi tandaon
ni ganup pardousa na butak na golap.
Gok hapansingon-Mu, Ham do parkuasa,
gok haholongon, Ham o Naibata.

-------------------------- saat teduh  --------------------------

 

·         VOTUM – INTROITUS - TONGGO

P.         Ibagas Goranni Naibata Bapa pakon Tuhan Jesus Kristus ampa Tonduy Na Pansing, Sitompa langit pakon tanoh on.

P.+K.   Amen.

P.         Malas do uhurhu, sanggah ihatahon halak bangku: Laho ma hita hu rumah ni Jahowa.

K.        Jongjong do nuan naheinami, bani horbanganmu, ale Jerusalem.

P.         Ale Jerusalem, na pinajongjong songon kota, na niatur gabe mardomu.

K.        Tangkog do hujai sagala morga, morga ni Jahowa, aturan do ai bani Israel laho mamuji goran ni Jahowa.

                                                                                                                                               

P.         Tongon, ijai do ipajongjong hotak paruhuman, hotak bani ginompar ni si Daud.

K.        Pindo nasiam ma damei bani Jerusalem; mardamei ma sagala na mangkaholongi ho.

P.         Sai damei ma masa ibagas tembokmu, na sonang ibagas rumah bolonmu.

K.        Halani saninangku pakon huan-huanku, sai pindohononku do damei ibagas ho.

P.         Halani rumah ni Jahowa Naibatanta, sai pindahanku do na madear bam. Haleluya. Haleluya. Haleluya.

P.+K.   (mandodingkon) Haleluya. Haleluya. Haleluya.

P.         Martonggo ma hita.

            Ham Tuhan Naibata simada holong ampa kuasa, pujionnami do goran-Mu na pansing in, bani idop ampa holong ni atei-Mu manramotkon pargoluhonnami. Nuan sada do hanami kuria-Mu bani Minggu Seksi Inang sa-GKPS, na ipestahon hanami panorang on. Marolob-olob do tonduynami mandompakkon hamuliaon-Mu, ai hasaksian bolon do manipat ibagas goluhnami, ganup dear layak-Mu na so tarbilangi in. Ham ale Tuhan, sai lambin sagad ma holong ampa damei-Mu in ibagas dirinami marsada-sada, ase gok hadoharon ganup tanoh on. Ibagas janah marhitei Jesus Kristus, ipadas hanami tonggo ampa pamujionnami.

P.+K.   Amen.                                                                                 (hundul Kuria)

 

·         DODING: HALELUYA NO. 402:1-2

1. Puji ma Naibatanta bai ianan napansing-Ni in, bai paratas hamuliaon-Ni in,
Haleluya! Haleluya! Puji ma Naibata.
Pasangap ma goran-Ni halani pambahenan-Ni in, ampakon hagogohon-Ni in
Haleluya! Haleluya! Pasangap Naibata.
Pahata ma tarompit ‘ge arbab pe, irandu pakon gonrang husapi pe.
Irik homa sarunei ‘ge sordam pe, sonai ampakon ogung marolol bei.
Puji ma! Rumbuk ma baen parhata ni parugas in.
Sombah ma! Marhiteihon ni doding na lurlur ijin.

2. Puji ma Naibatanta, Sipargogoh na tarsulur in, parsimada harajaon in.
Haleluya! Haleluya! Puji ma Naibata.
Pasangap ma Goran-Ni, ale ganup na marhosah in, ningon rup ma mamuji ijin.
Haleluya! Haleluya! Pasangap Naibata.
Pahata ma tarompit ‘ge arbab pe, irandu pakon gonrang husapi pe.
Irik homa sarunei ‘ge sordam pe, sonai ampakon ogung marolol bei.
Puji ma! Rumbuk ma baen parhata ni parugas in.
Sombah ma! Marhiteihonni doding na lurlur ijin

·         GANTIH NI TITAH

P.         Tangar hita ma gantih ni Titah na sapuluh in, aima na tarsurat bani Lukas 6:36-38, “Gabe paridop ni uhur ma nasiam, songon Bapanasiam, paridop ni uhur in. Ulang ma nasiam manguhum-uhumi, ase ulang hona uhum nasiam! Ulang ma nasiam mamapai, ase ulang hona papa nasiam! Paluah nasiam, ase ipaluah nasiam! Bere nasiam ma, ase ibere bani nasiam! Parsuhatan na madear, na nionjat, na nidugur anjaha na pinajunjun bereonni bani abingan nasiam; ai parsuhatan, na sinuhatkon nasiam do, suhatkonon bani nasiam.”

            Riap ma hita mangindo:

P.+K.   Ham Tuhan Naibata, pargogohi Ham ma au mangkorjahon hata-Mu ai. Amen.

 

·         DODING: HALELUYA NO. 260:1-2

1. Sai kawahkon partandaan na ibabou in.
Idahonmu hamonangan ni Tuhanta in.
Naibata do hasomanta in ma dilo bei.
Gotong hagoluhan in do jaloonta bei.

2. Tonggor ma ganup suruhan ni sibolis roh.
Ai buei do italuhon sai puho ma ho.
Naibata do hasomanta! In ma dilo bei;
Gotong hagoluhan in do jaloonta bei.

·         HASASAPAN NI DOUSA                                                          (Jongjong Kuria)

P.         Kuria ni Tuhanta, paunduk hita ma uhurta mandompakkon Tuhanta, laho manopoti ganup dousa ampa hahuranganta. Sabonar ganup do hita mardousa anjaha lang adong sipujion i lobei-Ni Naibata.

 

(Singers mandodingkon “Holong ma Ham Tuhan”)

 

P.         Ham ale Tuhan, roh do hanami ibagas unduk ampa toruh ni uhur. Mangaku do hanami bani buei ni dousanami marhitei uhur, parsahap sonai age pangabak. Ulang ma padaoh Ham panonggor-Mu humbannami. Tatap Ham ma hanami na doyuk on.

K.        Hotop pitah tartuju bani dirinami sandiri ope hanami, Tuhan. Hurang sari ope hanami bani hasoman na patut siuruponnami. Dong ope humbani kuria-Mu, mandalankon horja na so sintong asal ma jumpahan hamalumon, mandalankon sisip ase jumpahan hadoharon na i tanoh on. Haganupan ai pataridahkon hajongjongannami na holongan bani diri sandiri.

P.+K.   (mandodingkon) “Holong ma Ham Bannami”

P.         Itodoh Ham do hanami ase gabe haposan, tapi hotop do lansei hanami bani  horja ampa tanggung jawabnami. Lang ope humbani bulus ni uhur hanami mandalankon horja haholongan in.

K.        Urah

ope luar humbani pamangannami hata na boi mambahen borit uhur ni hasoman. Hampung ni uhur laho mansahapi hajongjongan ni hasoman, in pe hotop ope masa i tongah-tongahnami. Lang hadoharon na luar humbannami tapi gabe partolsuan do use gariada.

P.+K.   (mandodingkon) “Holong ma Ham Bannami”

P.         Ham Tuhan, anggo lang holong ampa idop-Mu pabayuhon hanami, lang anjai boi hanami lopas humbani rahut-rahut na i dunia on. Jora ma hanami Tuhan janah lang be ituruti hanami hisap-hisap na parohkon dousa ampa habutakon in.

K.        Holong ma Ham ale Tuhan, ulang padaoh Ham bohi-Mu humbannami. Togu Ham ma hanami na mangarap bani paridopan-Mu.

P.+K.   (mandodingkon) “Holong ma Ham Bannami”

P.         Tangar anjaha haporsayai hita ma hata ni Naibata bagah-bagah pasal hasasapan ni dousa, “Anjaha mangkopkop haganup do Ia matei, ase ulang manggoluh bani dirini bei na manggoluh in, tapi ase manggoluh sidea bani na dob matei anjaha mulak manggoluh mangkopkop sidea.” (2 Korint 5:15)

            Ibagas holong ni Naibata, domma isasap haganup dousanta. Halani ai, pataridahkon hita ma tanda-tanda ni pargoluhon na bayu.

Hasangapon ma bani Naibata i babou.

P.+K.   Amen.                                                                      (hundul kuria)

 

·         DODING: HALELUYA NO. 337:1-2

1. Hu sombah Ham Tuhan tangihon au!
Sai uhur-Mu Tuhan pasaud Ham.
Sai lambin tambah ma holongku hu Bamu.
Sai tambah ma holong Bamu.

2. Sanggah na kahou au, daoh hum Bamu.
Sai ipindahi Ham, jumpah Ham au.
Halani in holong do, uhurhon Bamu.
Sai tambah ma holong Bamu.

·         SIBASAON

P.         Tangar hita ma hata ni Naibata na tarsurat bani 1 Korint 1:18-25.

            Ai haotoon do hata pasal silang in bani halak na laho magou, tapi hagogohon ni Naibata do in banta, na jumpahan haluahon.

K.        Ai tarsurat do, “Huparseda do hapentaron ni na pentar, anjaha huambukkon do uhur ni siparuhur.”

P.         Ija do halak na pentar? Ija do sibotoh surat? Ija do siparsual-sual ni dunia on? Ai lang gabe haotoon do hapentaron ni dunia on ibahen Naibata?

K.        Ai halani ibagas hapentaron ni Naibata, seng itanda dunia on Naibata marhitei hapentaron, gabe iharosuhkon Naibata ma paluahkon na porsaya in marhitei ambilan haotoon.

P.         Ai na mangindo tanda do halak Jahudi, anjaha mangindahi hapentaron halak Gorik.

K.        Tapi anggo hanami, Kristus na tarsilang in do iambilankon hanami; parsangsian do in bani Jahudi anjaha haotoon bani halak sipajuh begu-begu.

P.         Tapi bani na dob tardilo ai, halak Jahudi age halak Gorik, Kristus, ai ma hagogohon ni Naibata ampa hapentaron ni Naibata.

K.        Ai haotoon ni Naibata, pentaran do ai ase jolma in, anjaha hagalekon ni Naibata, gogohan do ai ase jolma in.

P.         Martuah ma na manangar hata ni Naibata anjaha na marimbagaskonsi.

P.+K.   Amen.

 

·         DODING:  HALELUYA NO. 207:1-2

1. Bere Ham ma hatorangan, hapentaran mangarusi hata-Mu
ampa mata na mangidah pakon uhur na mambotoh dalan-Mu.
Ase tongtong mandompakkon bohi-Mu hanai mardalan
ase igomgomi Tonduy-Mu hanami.

 

2. Sai ajari Ham hanami, na tongtong ibagas haotoon in.
Sai porsaya ma hanami, Ham tumang do hagoluhannami in.
Roh dokahni, roh dohorni, uhur-Mu bai uhurnami.
Sai sadalan pakon Hata-Mu hanami.

 

·         MANAKSIHON HAPORSAYAON

P.       Riap ma hita jongjong!

          Saksihon hita ma haporsayaonta in, songon na sinaksihon ni haganup halak na porsaya bani sab tanoh on. 

 P.+K. Ahu porsaya bani Naibata Bapa, Pargogoh na so tarimbang, Sitompa langit pakon tanoh on ….. psb.                                       (hundul Kuria)

·           ACARA KHUSUS

a. Mambasa/Manaksihon Video Tonah ni Pimpinan Sinode GKPS

b. Mambasa Puisi

c. Koor Inang: “Idilo Tuhan”

d. Vocal Grup Shalom

e. Mars Seksi Inang

f. Vocal Grup Pengurus Inang Resort

g. Tingting Kuria

h. Tonggo Pangapition

·           DODING: HALELUYA NO. 472:1-2

1. Seng adong na dos, songon Ham o Tuhan,
na sai sirsir mangkasomani hanai on.
Pitah Ham tongon, Naibata na sintong,
ganup pambaenan-Mu gok halonganan do.
Sagala bangsa do, na jinadihon-Mu,
marsombah roh hu lobei-Mu.
Pasangapkon Ham, ronsi sadokahnin,
timbul janah pansing do Goran-Mu ijin.

2. Sai ajarhon Ham, dalan-Mu bangku on,
ase mardalan au bai hasintongan-Mu.
Sai baluti Ham, uhurhon sai tongtong,
ase marhabiaran bani Goran-Mu.
Ai pitah Ham Tuhan, na boi haposankin,
bai goluh sidalanankin.
Bokas-Mu nuan, si irikkononkin,
na gabe suluh bani pardalanankin.

·           AMBILAN: Psalmen 19:8-15

 

·           GALANGAN

P.    Paima iondoskon hita galanganta, tangar hita ma lobei hata ni Naibata na gabe onjolan banta laho manggalang, aima na tarsurat bani Psalmen 116:17-18, “Bamu ma galangkononku galangan puji-pujian, anjaha goran ni Jahowa ma padilo-diloonku. Bagah-bagahku bani Jahowa, hugalari ma, hugalari ma i lobei ni haganup bangsa-Ni.” Sonari ondoskon hita galanganta!

(Singers mandodingkon: “Ijon Huboan Tuhan” (Galangan)

 

 

·                      TONGGO GALANGAN – HAM BAPANAMI – PAINGKATHON – PASU-PASU

P.         Riap ma hita jongjong.

            Martonggo ma hita mangondoskon galanganta hubani Tuhan Naibata. Ham Tuhan Naibata, Ham do simada ganup pasu-pasu na ondos hubannami; janah marhitei pasu-pasu in do mambahen tardalani hanami pargoluhan on. Nuan roh do hanami mangondoskon galangannami, galangan tanda tarima kasihnami bani holong ampa pansarihonon-Mu bannami. Jalo Ham ma galangannami on gabe galangan na misbou i lobei-lobei-Mu.Tatap ham ma uhurnami borsih mambere, age pe hurang namin ope in marimbang buei ni silayak-layak-Mu bannami.

P.+K.   (mandodingkon) Galangan (reff)

Galangannami on, ondos ma in Bamu Tuhan.

Na gabe hiteinami tong martarima kasih.

Tongon lang hasuhatan ganup pasu-pasu-Mu.

Uhurhu na borsih manggoki bilangan ni.

P.         Ham Bapanami na i nagori atas. Sai na papansing ma Goran-Mu. Sai roh ma harajaon-Mu. Sai saud ma harosuh ni uhur-Mu i nagori tongah on songon na i nagori atas. Bere Ham ma bannami sadari on hagoluhan ari-ari. Sasap Ham ma dousanami songon panasapnami bani dousa ni hasoman na mardousa dompak hanami. Ulang hanami bobai Ham hu parlajouan. Paluah Ham ma hanami humbani pangagou.

P.+K.   (Mandodingkon) Ai Ham do simada harajaon, pakon hagogohon, ampa hasangapon sadokah ni dokahni. Amen.

P.         Laho ma nasiam janah pindahi nasiam ma na madear, ulang ma na jahat, ase manggoluh nasiam; ase tongon ma Jahowa, Naibata Zebaot hasoman nasiam, songon na hinatahon nasiam (Amos 5:14).

P.         Jalo hita (ham) ma pasu-pasu humbani Tuhan Naibata: Ipasu-pasu anjaha iparorot Tuhan Naibata ma hita (ham). Isondangkon Tuhan Naibata ma bohini hubanta (hu bamu) janah maidop ma uhur-Ni mangidah hita (ham). Idompakkon Tuhan Naibata ma bohi-Ni hubanta (hu bamu) janah ipasorap ma damei-Ni bani tonduyta bei (tonduymu). Amen.

P.+K.   (mandodingkon) Amen. Amen. Amen.

 

 POSTLUDIUM

Singers mandodingkon Ijon Huboan Tuhan (Galangan)

INANG

Karya: Yessi Gelsani Sijabat

 

Ganup ari manogod

Keskas marugas do ham

Itadingkon ham jenges ni nipimu

Bani tibal ni podomanmu

 

Patorsahan ampa pasirsirhon ganup haporluan i tongah ni jabumu

Pasalosei ganup hawajiban bani abaramu

Ransei sipikkirhonon, sipata parroh sursar

Bani buei ni ulih bani niombah

 

Age pe sonai…

Bungkus do ibahen ham ganup hagobiron in

Marlapit sengeh na uhir bani bohimu

Gabe hampung ganup na borat

Igoki ham pangarusionku, imamah ham hauhuron

Ipagogoh ham naheihu mandompakkon dalan hu lobei

 

Inang.....

Lang itandai ham loja

Lang iarahkon ham ringis

Age pe parlahouhu lembang humbani sibar-sibar

 

Gati do homa lang jumpahan sura-sura romban bai pinarsinta

Ganupan in na maningon boluson do

Marpangarapan bani haparngiton

Ronsi das bani sinura

 

Torus do iajari ham

Iparmudu-mudu ham homa

Ojur-ojurmu pahinsah naheihu

Laho manatap hasoman na ibagas hasombuhon

 

Ganup borngin martonggo do ham inang

Iayop ham ganup sindohormu ondos

Pangarapanmu siihut-ihutkonon

Haporsayaonmu lanjar siusihon

 

Ia au anakmon inang… sipata tonjan do au

Anggo mardingat ganup pambahenanku

Gendo lang soya namin ganup halojaonmu

Mangkopkop hanami lambin matua bohimu

 

Tuhan... elek janah tonggongku Bamu

Bahen Ham ma au gabe parhiteian pasonangkon inang

Bere ham ma bangku uhur na pentar managami

Gabe hadoharon ni paruhuran

 

Sihol hudahop gomos lanjar marhusip nanget

“Tarima kasih Inang bani haganupan halojaonmu”

Horas janah jorgit ma ham bani ari-arimu

Ganjang ma umurmu janah jorgit

Ipasu-pasu Tuhan ma ham tongtong.

******

Selamat Minggu Seksi Inang GKPS ma banta ganup

Horas... Horas... Horas...

“Segenap Pengurus Inang GKPS Jambi Mengucapkan

Selamat Minggu Seksi Inang GKPS Tahun 2024 Kepada

Seluruh Inang GKPS Jemaat Jambi”.