Horas
Salam ibagas goran ni Tuhan Jesus Kristus, Raja ni Kuria in. Minggu Pelayanan hubani na mabalu, lansia, na tading maetek, pakon difabel, aima sada minggu khusus na ipestahon GKPS laho manonggohon, Sonai homa patoguhkon hajongjongpnni hasomanta na mabalu, lansia, na tading maetek, pakon difabel.
Marpandomuan hujai, ipadas hanami tonah bani Minggu pelayanan Hubani na mabalu, lansia, tading maetek, pakon difabel sadarion. GKPS lang boi lopas humbani ganup pagori ni kuriani. Haganupan pagori ni kuria GKPS gabe siparbagianan bani ganup horja pandiloan ni gareja.
Ganup do pagori ni kuria in maningon manjalo ampa mambere diri ni bani pangidangion na tang sijengesan hubani garejanta.
Ase, lang boi hatahononta paboa pitah sasahalak atap sada kelompok hansa na gabe sipargagian bani garejanta. Gariada, apostel Paulus mangkatahon ( 1 Koriny 12:22-23) "Tapi tene, pagori na tar hurang idahon, ai do siporlunan, anjaha pagori ni angkulanta, na hurang harga ninuhurta, ai do sangapan ibahen hita, anjaha na hurang sangap ninuhurta sarinan do hita pasal ai".
Tumpuan ni na mabalu aima tumpuan na dob dokah adong i GKPS on. Songon na ibotoh hita, somal do tumpuan ni namabalu ai igoran: Inang Naomi, atap inang Rut, atap inang Maria.
Iadongkon sidea do partonggoan laho marsada anjaha mamparimbagaskon hata ni Tuhan. Sirsir do homa sidea manrohi anjaha manonggohon pagori ni kuria na boritan. Bani Bibelta tarsurat do, "Ididah ma homa naboru na mabalu na masombuh mannahkon dua rimis. Jadi ihatahon ma, "Sintong do na Huhatahon on bani nasiam: Buenan do na ninahkon ni na mabalu na masombuh on marimbang haganupan ai". (Lukas 21:2-3).
Halani ai, totap do iojur hanami hubani na namabalu ase sirsir manggalangkon na tang sijengesan hubani Tuhan.
Tumpuan ni lansia aima sada tumpuan na hotop martumpu ibagas malas ni uhur. Sipata, girah sogot do sidea martumpu i garejanta, mangadongkon partonggoan, sonai homa senam kesegaran jasmani.
Age ibagas hatuaon ni sidea, lang ongga moru semangat ni sidea ibagas na marTuhan. Siusihon ma hapongkutan ni sidea ai bani na manjaga haporsayaonni hubani Tuhan. Tongon ma hata ni Tuhan na mangkatahon "Marbuah do sidea age dob matua, tongtong tabun anjaha maratah"(Psalmen 92:15).
Na tading maetek aima na lang marbapa, atap lang marinang, GKPS dihut do mangidangi na tading maetek tiba Panti Asuhan BKM GKPS mamungkah humbani tanggal 24 Juli 2005. Tongon borat do sitaronon ni na tading maetek, halani porlu ope bani sidea podah pakon pangajarion humbani namatoras.
Age pe sonai, lang otik humbani na tading maetek na boi jumpahan sura-sura bani pargoluhanni. Pos do uhurta, adong do Tuhan na gabe bapa pakon inangni. Songon nini Tuhan Jesus, "Seng tadingkonon-Ku hanima tading maetek; na roh ma Ahu marayak hanima". (Johannes 14:18).
Na difabel pe dihut do homa gane siparbagian i tongah-tongah ni GKPS. Bani tanggal 28 Mei 2005, jongjong ma Rahabilitasi Bersumberdaya Masyarakat (RBM) GKPS.
Ronsi nuan, torus do ibaen hita na tang sijengesan, laho memberdayahon pagori ni kurianta na memiliki kemampuan na marbeda-beda.
Halani ai, hahuranganta lang boi mengambati hita laho pasangankon Tuhan. Songon natarsurat in "Jadi iidah Naibata ma sagala na tinompa-Ni ai, domma dear tumang."(1 Musa 1:31).
Sonai ma tonah on ipadas hanami, lambin jenges ma tongon horja pangidangionta i tongah-tongah ni kuria in, bani na mangojur na mabalu, lansia, tading maetek, pakon difabel. Horas.
Pimpinan Sinode GKPS Periode 2025-2030
.jpg)
0 Komentar