Ibadah Olob-olob Kuria GKPS Jambi, RUJI-RUJI 123 TAHUN PARDAS NI AMBILAN NA MADEAR I SIMALUNGUN

RUJI-RUJI 123 TAHUN PARDAS NI AMBILAN NA MADEAR I SIMALUNGUN

P. Kuria na hinaholongon, bani tahun 1861, adong sada badan zending na margoran Rheinische Missions Gesellschaft (RMG) roh hu tano Batak anjaha pajongjongkon gareja na igoran Huria Kristen Batak Protestan (HKBP). Mamungkah tahun 1900 lambin ipabolag ma horja zending ai hu tanoh Simalungun. Maronjolan hubani telegram “Tole! Den Timorlanden das Evangelium” bani tanggal 2 September 1903 borhat ma Pdt. August Theis hu Pamatang Raya anjaha tanggal on ma na itotapkon gabe ari pardas ni Ambilan na Madear in i Simalungun.

Tahun 1940, ibaen HKBP ma sada bentuk pangidangan na igoran HKBP Distrik  Simalungun, ase boi halak Kristen i Simalungun pataridahkon hajongjongan ni selaku halak Simalungun. Bani tanggal 5 October 1952, HKBP Distrik Simalungun lambin manggargar gabe Huria Kristen Batak Protestan Simalungun (HKBPS). Bani tanggal 1 September 1963, HKBPS manjae humbani HKBP gabe Gereja Kristen Protestan Simalungun (GKPS).

Bani tahun 2026 on, gok ma 123 tahun Ambilan na Madear in marianan i tongah-tongah. Marhitei GKPS, Ambilan na Madear in ibaritahon hubani ganup na tinompa, paboo haluahon aima idop ni uhur ni Naibata marhitei Jesus Kristus.

Ihamalaskon hita do parrohni Ambilan na Madear in hu tanoh Simalungun marhitei ibadah Olob-olob Kuria sadari on. Martarima kasih banggal do hita hubani Tuhan bani haluahon na dob ijalo hita marhitei Anak-Ni, Jesus Kristus. 

Ase sonari, riap ma hita jongjong. Ondoskon hita ma galangan boras tengerta, hataridahan ni malas uhurta hubani Tuhan Naibata na mamboban haluahon hubanta na dob das Ambilan na Madear in hu tongah-tongah.(AsenkLeeSaragih)