GEREJA KRISTEN PROTESTAN SIMALUNGUN (GKPS) 
SIMALUNGUN PROTESTANT CHRISTIAN CHURCH

Pimpinan Sinode GKPS

Ephorus : Pdt. John Christian Saragih, S.Th., M.Sc
Sekretaris Jenderal : Pdt. Dr. Jahnotner Saragih

Pematangsiantar, 23 Agustus 2026

No. : 616/1-PS/2026
Hal : Tonah Pimpinan Sinode GKPS bani Minggu Pelayanan hubani na Mabalu, Lansia, Tading Maetek pakon Difabel

Hubani Nahinormat:
Haganup Warga GKPS
Tiba Pengantar Jemaat
Bani ianan ni bei.

Horas ma hubanta haganupan salam inklusi.

Kuria na hinaholongan ni Tuhanta.

Sadari on aima minggu pelayanan hubani na mabalu, lansia, na tading maetek, pakon warga na berkebutuhan khusus. Marpardomuan hujai, ipadas hanami ma tonah bani Minggu Sahabat Khusus sadarion:

Bani Minggu Sahabat Khusus on ipatalar hubanta: sisada angkula do hita ibagas Kristus hansi pe marbagei-bagei pagorini. Sarupa do hita i lobei-lobei ni Naibata na mangontang haganup halak masuk hubagas kuria-Ni. Songon panjaloni Naibata hubani sahabat khusus, tontu sonai do homa patut bahenon ni kuria-Ni na mambere ianan hubani sahabat khusus i GKPS.

Ra adong ope keterbatasan na ijumpahkon sidea na mambahen mahol sidea riap ibagas parsaoranta. Aha do sibahenonta anggo adong pagori ni kuria on na lang boi be roh hu gareja halani hatuaonni, halani angkulani na maningon tibal mando i podoman? Halani kondisi ekonomi na hurang tumang?

Sihol do namin sidea hu gareja tapi adong keterbatasan mambahen mahol sidea dihut, umpamani: hambatan sikap dampak difabel atap berkebutuhan khusus, halani lape ope sirsir ianan atap fasilitas bani sidea difabel.

Marhitei Minggu Sahabat Khusus on ma hita mangevaluasi janah manangihon aha do harapan ni hasoman sahabat khusus bani kuria ni Tuhanta i GKPS on.

Hubani orang tua lansia, bapa/inang na mabalu, na tading maetek pakon na difabel, sai sada do hita i lobei-lobei ni Tuhan in. Porini pe nasiam ibagas keterbatasan, tapi lang ai mambahen pulig nasiam humbani hasadaonta.

Riap do hita i kuria on mambere gogoh, pingkiran, panorang laho pasangapkon Tuhan in. Ai sari do Tuhan hubanta haganup age hubani nasiam.

Songon na ihatahon apostel Paulus bani 1 Korintus 12:22-23:

“Tapi tene, pagori na tar ae idahon, ai do siporlunan, anjaha pagori ni angkulanta, na hurang harga nini uhurta, ai do sangapan ibahen i, ala na hurang sangap nini uhurta sarinan do hita pasal ai.”

Halani ai ulang pala etek uhur nasiam ai sisada angkula ganupan i lobei-lobei ni Tuhan in.

Kuria na hinaholongan ni Tuhanta,

Sihol do hita pataridahkon sada gareja na inklusi, aima gareja na sari janah manjalo haganup. Gareja ang mambahen parlegan-leganon, gareja na mangidah sahabat khusus sedo gabe objek pelayanan tunane, sipangidangi domu hubani talenta ni bei.

Ase riap sauhur sapanriah ma tongtong hita pasangapkon Tuhan in, tarobi ase lambin ipardiateihon hita ma hasomanta na ginoran sahabat khusus i GKPS on.

“Salam Inklusi: Ahu, Ham, gabe Hita”.

Salam pakon Tonggo,
Pimpinan Sinode GKPS


Pdt. John Christian Saragih, S.Th., M.Sc
Ephorus

Pdt. Dr. Jahnotner Saragih
Sekretaris Jenderal.

(Disadur Dari Buletin AB GKPS Edisi 624 Agustus 2026)